25 Febrüari 2025
Kralendijk – Trahando riba un Akuerdo entre e Dialógo Sentral i Gobiernu Hulandes pa medidanan struktural pa mehorá situashon sosial i ekonomia di forma sostenibel
E Dialógo Sentral (DS) a aprobá su rapòrt anual di 2024 durante su prome reunión. Ademas, a trata plannan pa 2025.
Den 2024, e benefisionan sosial i sueldo mínimo a subi konsiderabelmente. E proseso aki a inisiá den 2021 ku e Akuerdo di Kralendijk, kaminda, riba inisiativa di empresarionan, a proponé pa subi sueldo mínimo den fase. Esaki a resultá den un mehorashon di entrada pa hopi habitante di Bonaire.
Sinembargo, e Dialógo Sentral ta preokupá tokante e gastunan di bida. E fin di subsidio riba e gastu fiho di elektrisidat por bira un faktor ku ta konsumi e benifisio di e aumento di entrada. Esaki por krea presion inflashonario, kaminda mas oumento di sueldo por ta nesesario, ku na su turno ta pone mas preshon riba e sektor empresarial.
Un problema fundamental ku e DS ta mira, ta e falta di un politika koordiná i struktural di banda di e Gobiernu Hulandes. Kada ministerio tin su mes responsabilidat, pero no tin sufisiente koordinashon i armonisashon tokante e impakto real riba e sosiedat i ekonomia di Bonaire. Hopi medidanan ta ad hoc, insidental i genériko, sin un strategia klaro. Ademas, sin data konfiabel, ta difísil pa monitoriá i evaluá e efektonan di e medidanan implementá.
E Dialógo Sentral ta aspirá pa firma un Akuerdo di Kralendijk nobo den 2025, e bia aki ku kompromiso i envolvimentu aktivo di vários ministerionan. Solamente ku un enfokeintegrá, e situashon sosial i ekonomiko di Bonaire por mehorá di un forma sostenibel.
Entre tanto, e Dialógo Sentral ta trahando riba un mehor entendimento di e ekonomia di Bonaire i lo laga hasi investigashonnan riba diferente tipo di negoshinan i desaroyando un modelo ekonómiko pa kalkulá e impakto di subida di sueldo mínimo i otro medidanan struktural.
Tambe tin preokupashon tokante kumplimentu di e oumentonan di sueldo den praktiká. Tin indikasonnan ku no tur empleado ta haña e sueldo mínimo nobo. Algun hende no ta haña su pago na tempo, o tin ku traha mas ora sin risibí pago pa esaki.
Pa empresarionan ku tin kontrato largu, ta difísil pa transferí e oumento di kosto den e tarifanan di nan servisio. Aunke algun negoshi chikí por haña difikultat finansiero, tin tambe kasonan di eksplotashon di trahadónan. Esaki ta suprayá e nesesidat pa mehor sosten na e empleado i e dunadó di trabou, i mester fortalesé e inspektoria laboral.
Un solushon fásil por ta un kòntròl simpel di kontrato, slep di salario, òf pago di sueldo ku un lokèt legal aksesibel. Ta desepshonante ku e lokèt legal promé planifiká, no a keda realisá na e mes momento ku e ministerio di Hustisia i Seguridad a duna promesa pa implementá esaki.
E Dialógo Sentral ta kontinuá ku su esfuersonan den 2025 pa defendé e negoshinan i habitantenan di Boneiru.
Pa informashon: Mervyn Stegers (vise presidente Diálogo Sentral), (+599 7866812, mkm.stegers@famstegers.nl)
E Dialógo Sentral Boneiru ta un mesa di konsulta lokal, kaminda e kuerpo públiko, sindikatonan, representante di dunadónan di trabou i Kámara di Komersio ta partisipá. E partidonan ta traha den e Dialógo Sentral pa kontribuí, via konsenso, na un Boneiru sosial, ekonomiko i ekológiko sostenibel.